मलठण प्रतिनिधी
दौंड तालुक्यातील मलठण, खानोटा, काळेवाडी, बोरिबेल, राजेगाव, लोणारवाडी या गावात व पंचक्रोशीत बिबट्याने अक्षरशः धुमाकूळ घातला असून, या बिबट्याच्या हल्ल्यात अनेक वासरे, शेळ्या, कुत्रे फस्त झाली आहेत. या बिबट्याचा वन विभागाने त्वरित बंदोबस्त करावा, अशी मागणी येथील ग्रामस्थांनी केली आहे.
बिबट्याने चक्क गावातही वर्दळीच्या ठिकाणी जनावरांच्या गोठ्यात जाऊन अनेक शेळ्या, वासरे, कुत्रे फस्त करण्याचा धडाका लावला आहे. बिबट्याच्या दहशतीमुळे ग्रामस्थ, शेतकरी धास्तावून गेले आहेत. तर वाड्या वस्त्यावरून येणारे शालेय मुले अक्षरशः भयभीत झाले आहेत. गेली दोन महिन्यापासून धुमाकूळ घालणार्‍या या बिबट्याचा वन विभागाने त्वरित पिंजरा लावून बंदोबस्त करावा, अशी मागणी येथील ग्रामस्थ करत आहेत.
या भागात शेतमजूर, कामगार शेतात कामांसाठी येत नाही त्यामुळे शेतकऱ्यांना मोठ्या अडचणींना सामोरे जावे लागत आहे. वनविभागाला अनेक वेळा माहिती देऊनही तुम्हीच फटाके वाजवा, सावध राहा आगीचा भडका करा अशा तोंडी सूचना देऊन वेळ मारून नेण्याची नामुष्की दौंड वन प्रशासनावर आली आहे.
पिंजरा लावण्याची मागणी करूनही वनविभाग आज, उद्या, परवा पिंजरा लावू असे म्हणतात व पिंजरा लावण्यासाठी टाळाटाळ करत आहे. त्यामुळे वनविभागाच्या भुमिकेवरच प्रश्न चिन्ह निर्माण झाले आहे. बिबट्याच्या हल्लात नाहक बळी गेल्यावर वेळ येईल व प्रशासन पिंजरा लावणार की काय असा सवालही येथील नागरिकांना पडत आहे.
