पुणेरी टाइम्स टीम (पुणे)…
शाळाबाह्य अशैक्षणिक कामे, ऑनलाईन कामे बंद करा आणि आम्हाला फक्त मुलांना शिकू द्या अशी आर्त हाक देत महाराष्ट्र राज्य प्राथमिक शिक्षक संघाने राष्ट्रपिता महात्मा गांधी यांच्या जयंतीचे औचित्य साधून येत्या 2 ऑक्टोबर रोजी महा आक्रोश मोर्चाचे आयोजन केले आहे. यामध्ये राज्यभरातील शिक्षक लाखोंच्या संख्येने प्रत्येक जिल्ह्यातील जिल्हाधिकारी कार्यालयावर धडक देणार आहेत. या महामोर्चाच्या प्रचार प्रसाराची प्रातिनिधिक सुरुवात दौंड तालुक्यात शिक्षक नेते शांताराम जगताप जगताप यांच्या प्रमुख उपस्थितीत करण्यात आली. याप्रसंगी बोलताना शांताराम जगताप यांनी सांगितले की अशैक्षणिक कामे ,ऑनलाईन कामे, अवाजवी माहित्या यामुळे शिक्षक बेजार झाले असून त्याचा थेट परिणाम विद्यार्थ्यांच्या शिक्षणावर आणि गुणवत्तेवर होत आहे. त्यातच शासनाने शाळांचे खाजगीकरण आणि कंत्राटी भरतीचे धोरण आणल्याने शाळा समूह योजना आणल्याने राज्यभरातील जवळपास 15000 शाळा बंद होणार असल्याने शिक्षकांमध्ये अस्वस्थता निर्माण झाली आहे. मुळात शासकीय शाळेत शिकणारी मुलेही गोरगरीब, कष्टकरी ,शेतकरी ,कामगार जनतेची मुले आहेत त्यांचा शिक्षणाचा हक्क आबाथित ठेवायचा असेल शासकीय शाळा टिकवायच्या असतील तर शिक्षकांसह ,पालक ,ग्रामस्थ, पदाधिकारी यांनी देखील या मोर्चामध्ये सहभागी व्हावे असे आवाहन जगताप यांनी केले आहे .या माध्यमातून शासनाचे लक्ष वेधून या सर्व विषयांचे गांभीर्य लक्षात आणून देण्याचा प्रयत्न शिक्षक संघाच्या वतीने केला जाणार आहे. याप्रसंगी विकास शेलार, रामभाऊ दोरगे, संदीप होले ,किरण कोल्हे ,सुरेश वाळके आदी शिक्षक संघाचे पदाधिकारी उपस्थित होते._
