पुणेरी टाइम्स कुरकुंभ:- (अलिम सय्यद)
दौंड तालुक्यातील पांढरेवाडी गावातील मुख्य रस्त्यावरील जवळपास दोन ते तीन किमी अंतराचे डांबरीकरण काहीच दिवसांपूर्वी झाले होते. त्या झालेल्या डांबरीकरणाला काही महिन्यातच खड्डे पडून रस्त्याची दुरवस्था झाल्याचा प्रकार समोर आला आहे. याबाबत स्थानिकांनी माध्यम प्रतिनिधींशी संपर्क करुन बातमी प्रसिद्ध केली होती. याचीच दखल घेत सार्वजनिक बांधकाम विभागाच्या अधिकाऱ्यांना बातमी आल्यानंतर का होईना जाग आली व संबंधित ठेकेदाराला खड्डे बुजवण्यास आदेश देण्यात आल्याची माहिती मिळाली आहे.
हिंगणिगाडा-रोटी शिव ते पांढरेवाडी असे किलोमीटर दोन ते तीन रस्त्याचे डांबरीकारणाचे काम चार ते पाच महिन्यांपूर्वी झाले होते. परंतु चार ते पाच महिन्यातच रस्त्यावर मोठ्या प्रमाणात खड्डे व तडे पडून रस्त्याची मोठ्या प्रमाणात दुरावस्था झाल्याने दोन ते तीन कोटींचा रस्ता चर्चेत आला होता. परंतु हे काम निकृष्ट दर्जाचे केले असल्याने हे खड्डे मोठ्या प्रमाणात पडले आहेत, अनेक ठिकाणी यांत्रिक तांत्रिक बाबींचा अभाव आहे, त्यामुळे ठेकेदाराने खड्डे बुजवून मलमपट्टी केलीय खरी परंतु काहीच दिवसांत परत याच ठिकाणी खड्डे पडून अपघात होण्याची शक्यता नाकारता येत नाही. तसेच रस्ता खराब होऊन तीन कोटींचा निधी पाण्यात जाण्याची शक्यता नाकारता येत नाही. त्यामुळे याबाबतची सर्व जबाबदारी सावजिनक बांधकाम विभागाचे अधिकारी घेणार का? असा सवाल येथील नागरिक करत आहे.
