पुणेरी टाइम्स टीम (ता. बारामती) बारामती तालुक्यातील सुपे पोलीसांनी शिताफीने एका चारचाकी वाहनसह गुटखा व सुमारे ३१ लाखांचा मुद्देमाल सुपे पोलीसांनी हस्तगत केला आहे. या प्रकरणी प्रशांत गांधी यास पोलीसांनी अटक केली असून, त्यास न्यायालयात हजर केले असता तीन दिवसांची पोलीस कोठडी मिळाल्याची माहिती पोलिसांनी दिली आहे. सदर गुन्ह्याच्या अनुषंगाने सहाय्यक पोलीस अधीक्षक दर्शन दुग्गड यांना गोपनीय माहिती मिळाल्याने बारामती मधील प्रशांत गांधी यांच्या घरात बेकायदेशीरपणे पान मसाला व गुटखा आहे अशी माहिती मिळाली होती. त्या अनुषंगाने पोलीसांंनी गुटखा माफिया प्रशांत धनपाल गांधी यांच्या बारामती मधील घरी छापा मारला सुरूवातीला बारामती येथील घराची झडती घेतली असता माल कोणतीही माल मिळाला नाही. मात्र चौकशी दरम्यान प्रशांत धनपाल गांधी (वय ४८, रा.लासुर्णे, ता.इंदापूर, जि. पुणे, सध्या रा. ऋषिकेश अपार्टमेंट, पेन्सील चौक, बारामती), याने निसार (रा. विजापूर, कर्नाटक पूर्ण नाव, पत्ता माहिती नाही), यांचेकडून आणलेला गुटखा पान मसाला व माल राहुल मलबारी (रा.यवत, ता. दौंड, जि. पुणे) यांना देण्यासाठी आणलेला गुटखा उंडवडी सुपे येथील फार्म हाऊसमध्ये माल लपून ठेवल्याचे समजले. त्यानंतर सहाय्यक पोलीस अधीक्षक दर्शन दुग्गड यांनी तातडीने सुत्रे हालवून सुपे पोलीस स्टेशनचे सहा पोलीस निरीक्षक नागनाथ पाटील व पथकाला गांधी यांच्या फार्म हाऊसवर अवैध सुगंधी पान मसाला व गुटखा असल्याची माहिती दिली. सहाय्यक पोलीस निरीक्षक नागनाथ पाटील यांनी पथकासह तातडीने घटनास्थळी जावून अवैध सुगंधी पान मसाला, गुटखा व एक वाहन असा एकूण ३० लाख, ९८ हजार, ८२० रूपयांचा मुद्देमाल आरोपीसह ताब्यात घेण्यात पोलीसांना यश आले आहे. याबाबत कसून चौकशी केल्यानंतर यवत (ता. दौंड) येथे सदरचा मुद्देमाल गुटखा घेवून जात असताना गाडी नादुरूस्त झाल्याने सदरील पान मसाला व गुटखा येथील फार्म हाऊसवर ठेवल्याची कबुली गांधी याने पोलीसांना चौकशी दरम्यान दिली.
सदरची कारवाई पोलीस अधिक्षक पंकज देशमुख यांच्या मार्गदर्शनाखाली करण्यात आली असून या कारवाई मध्ये सुपे पोलिस ठाण्याचे सहायक पोलीस निरिक्षक नागनाथ पाटील, पोलीस उपनिरिक्षक योगेश घोडके, जिनेश कोळी, लेंडवे, देशमुख, हवालदार काळे, इंगवले, तुषार ढावरे, सुदर्शन डोळाळकर यांचा सहभाग होता. या बाबतचा पुढील तपास सहायक पोलीस निरिक्षक नागनाथ पाटील करीत आहेत.
